Yiitere Jertino

E wanaa ko haawnii nde Afriknaajo faaɗinantee e nder Afriki ?

Afriknaajo mo ala haanduyee yiilagol nder Afriki!!

E nder Amerik kaydi heftinirdi pet maa duginol dogino( permis de conduire) yoniima fii ko juuroraa, yiiloroɗaa e nder laamateeri ndin fow. Hay feruɓe ɓe rewaa laawol ɓen no mari hakkee jinnduru. Woni ko Erop, maa suurire aaraabu ko wa non...

Ko ɓooyaa, oorngal ngal alaa nafa memminino liddu hoɓɓe ɓen, teeŋti non ɓaleeɓe ɓen... Ngal oorngal wanaa kesal sakko wona ko huunde juhinnde, ɓooyiraali non ko MORITANI holli faale waylugol taariika leydi ndi ko mi faandii ko hiiɗuɓe ɓen e maɓɓe faantini e aarabuyaagal. Ɗum no nanndita e on ajjiiɗo soofi hay e gooto o tuunintaa si wanaa hoore makko. Mo'aawiya etino fota kono o ronku.

Sabu ngal oorngal kaalisi feeterewal ngal Espaañ e Erop woni e waɗde dow laamu bonngu xazwaanii hingal ruttoo e piiji ndan:

Haɓugol ferugol ngol rewaa laawol, e wallitagol laamu ngun suumugol lo'ere maggu. Ko ɗum waɗi yo ngun laamu daro dadoo fii weltingol koohooɓe eropnaaɓe ka mejaaji renndo.

Etagol waylude taariika, maa buumude mo.

Ko tawde raneeɓe - hiiɗuɓe - fiɓuɓe wonde Moritani ko leydi aarabu e kadi ɓaleeɓe wonuɓe e mayri ɓen ko tosokel famɗungel.. ɗum-le ko feenaande fefindaande waylaande. Bal ko kamɓe hiiɗuɓe ɓen woni seeɗaaɓe famɗuɓe mayri, hara kadi hatonjinaa e dallinannde seeditannde.

Ɗuuɗere ɓaleeɓe e mayri no fawaɓe pellital wonde ɓeeleɓe ɓen hiɓe ɓeydaade e hino saatii kaɓe fooloyaɓe e kala saa'i.. ko ngol kulol tosokol woni ko hulɓini yoga e la'iifuuɓe maɓɓe.

Hoɓɓe ɓen nder Moritani ko golle ɗen ka cuuɗi ɓurɓe ɓen jokki, ko ɗen-le woni golle ɓurɗe jaasere ɗen, ɗe alanaa neɗɗo si wanaa sonjaa. Seeɗe e maɓɓe no golla ka fannu jannde kono ɓen e mum ɓittere ko wa mayre.

Haɗugol hoɓɓe ɓen dogingol werla njoddi, (taxi) hara ko ɗum tun?

Ɓen waɗayɓe ngal oorngal feeterewal ko wuyɓe ɓe laataaki ɓuri ɗum, ko habbiiɓe balle iwrayɗe yaasi fii tun deeƴingon bolle deedi maɓɓe. Ko yimɓe ɓe yananaaka gonal feruɓe Moritaninaaɓe... Himme maɓɓe ɗen fow ko kon ko ɓe wa'ata e mun kon. Moritani wonno e kadi seeraali haajooni ko leydi ɗaɓɓirndi ganndal diina. Ko ka sakkitorde ɗoo ndi woni leydi rewirndi faade Erop. Ngol laawol hingo soomori e maggol teemeɗɗe Moritaninaaɓe. Hay sengaali feerooɓe heewɓe rewii e mayri faade Espaañ. Teeŋti niinon ko Marok e TINIISI E LIBII uddi boli ɗin, ɓe taƴi ɓoggol fergu ngol

Ka raɓɓinɗino mi anndaa Afriknaajo hay e goo faaleteeɗo ñiiɓugol Moritani walla heɓugol heftinirndi seteyaagal, tawde non paspoor maɓɓe kamɓe Moritani ɓuraa hay paspoor gooto leyɗe hirnaange-Afriki. Leyɗe ɗe Moritaninaajo waawi setoraade sabu paspoor mum fow hino waawi kadi jeyaaɗo e leyɗe hirnaange-Afriki setagol e majje... Setoragol paaspoor Moritani ɓural hay e gootal alaa e mum ko alaa e ɗiya.

Yoga e lannde hino hatonjini lanndagol ko adii raɗagol hoɓɓe ɓen. Ko Moritaninaaɓe njelo woni nder senegaali ? koddi-waar ? Gine ?Gambi ?Angolaa ? e Gabon ?

Ko woni limoore Moritaninaaɓe feruɓe e nder ɗee leyɗe ?

Hino jojjani Amerikaa e leyɗe njane yewtugol fii fergu e uddugol laawi mum, sabu non ɓe ɗuuɗiraaka feruɓe. Ammaa non leydi tampundi ndi jamaa mum woni e maayude ka njorndi e ka maayo sabu ɗaɓbugol nguuree moƴƴo, no hersinaniiɗe ɓittingol seteeɓe ɓen...

Ella on fow ko ɓee njofooɓe raneeɓe hiiɗuɓe sikkaybe kala ɓaleejo ko koɗo dow anndal leydi ndin ko fuɗɗi ndin ko ɓaleeɓe.

En fow ko en feruɓe!!!

#Mo DAAWUUDA.

Ñalnde 28 colte 2025