Sayku Alhajji Alfa Abdul Qaadiru Jonfo, jibinaaɓe to leydi Gine e lewru 5ɓuru hitaande 1928. Ko geɗalɓe Cerno Julde JALLO (YAY), ganndo qur’aana anndaaɗo, e neene Mariyama Julde JALLO.
Ko Baaba en maɓɓe fuɗɗaniiɓe jannde Alqur’aana, ado ɓe halfineede Cerno Sariifu Tulun-Jaari (YAY). Ɓe huunjii Qur’aanaare nden e sukaakuyaagal maɓɓe (duuɓi 18).
Ɓaawo ɗum, giggol jannde nden naɓiɓe e juuɗe cernooɓe goo, wi'eteeɓe: Cerno. Ko ɓen Cernooɓe ɗon wonnoo winndanoowo Alfaa Yaaya JALLO, laamɗo diiwal Labe ngal sakkiiɗo. On tuma, ɓe jokkondiri kadi e Cernoojo mawɗo, wi’eeteeɗo Sayku Buubakar Zeydi Bansan (Gammbi).
Ɓe timminiri jannganaakuyaagal ngal, ka ɓee cernooɓe ɗoo ɗiɗo, taaranegol meetelol Cernoyaaku ka banŋe gannde diina Islaam, e ka hunnjagol e firugol kaamilu (Qur’aana) on. Sayku Alhajji Alfa Abdul Qaadiru Jonfo lollirii anndireede ganndal e nder Gine e haa e leyɗe janane ɗen, tenti noon to Senegaal, Gammbi, Marok e Alseri, ko ɗum addaniɓe tiitoonde Kaliifa Mawɗo to laawol Tijjaaniya.
E ngurndam maɓɓe ɗam fof, ko piiji ɗiɗi ɓe jokki : ko diina kan ( rewugol Allah) e gollugol leydi (rewrude e demal). Hannde, ko doomirteeɓe ganndal wonande yiɗɓe lugginde jannde mum nden walla ɗaɓɓude barki.
Hannde, Sayku Alhajji Alfa Abdul Qaadiru Jonfo taaranaama meetelol Mawɗo Musidal Fuuta Jaloo, lollirɗo Hooreejo Fuuta Jaloo maa Kaliifa Fuuta Jaloo. Fuuta Jaloo ka : Alfaa Ibraahiima Sammbeegu, Cerno Saalihu mo Ballaa, Cerno Sammba Mombeya, Cerno Saadu mo Dalen, Cerno Abuubakar Zeydi, Almaami Buubakar Biroo, Cerno Aliiwu Ɓuuɓa Ndiyam, Alfaa Yaaya Labe...
Ɓee Cernooɓe jogiiɓe taariika alɗuɗo wonaa heeriiɗo, kono ko o misal ka baŋŋe jokkugol islaam e yiɗgol Nelaaɗo (وسلم عليه هللا صلى)
Anndugol ɗum ɗoo yo wonu misal wonande jamaanu arooru ka banŋe diina Allah e ka renndo. Yo ɓe wonu pitilol jam, ganndal e ɓamtaare kala hawruɗo e laawol maɓɓe, huuɓita Fuuta Jalloo. Yo Allah weltano ɓe.
Aamiina !
Kommentare