Ka lannoode hitaande 2000, ɓaawo mi gaynude jannde an nden, mi iwi Labe. Gila mi iwi ton piiji buy woodi ko wayli ka saare Labe. Ko giiri-garaare wootere nden e laawi ɓorɗi kono sukkuɗi motoo, ko yurmondiral gootal ngal heddii gila eh okkindiro haa e lamɗam. Wuurugol hen no foti.
Mi juurii weldi an yanngodaljo. himo hoɗi eh ko be innata kon « Naata-waaloo », ko cu’el ngel meeterji pet hurndi. Ko nguurndam surgaajo (célibataire). Kono alaa ko ŋakki. Ko dankun kun daraaje laaɓuɗe, pantalon e dolokoy paasitaakoy fondindiraa, paɗal kala e nokku mun.
Jullere e piihoy yoga woy no fewnitaa wonti armuwaar. Ñemetewal no ka bude, itti-sikke kan eh daame. Miɗo jiñani few.
Mi hikkori ka juullere, mi udditi ordinateer an on fii golle. Weldi an kañum woni eh golle hoy mun suudu cewkoy. Yewtere nde miijooji ɓooyɗi no ondi hakkunde amen.
Eh nder hinƴaango, ɗowdi waɗi ka furgere wa hoodere e kammu wertiingu. Hakkee ko ɗum juhin-mi, mi ewnii “ Ndowru”!
Weldi an ka sera danki memminaaki. Deeƴere ɓittinde doolnunde aafii. Kisan mi sikkitii siko ndowru! mobee jokkitii e ngal mun.
Neeɓaali seeɗa “hoodere” nden felsitiri e ngol laawol noone goo, wa tatiire juutunde sewi nde sunsunko, kayru e ɓalel mayru liisiindu juutirndu bukkol.
E nder deeƴere tiiɗunde, min e weldi an meɗen yewtira telepatii ka men yeddondiraa, men waɗaa ɗiɗi e tati siko ndowru suudu nii, 😄😄😄
Mi ƴetti paɗal ngal mi welliimo tamƴinagol bete warugol ndu maa heƴinngol ndu. Mi woopi weddannde few. Jaka mi waɗataano.
Dow kulol, e hoolagol yaaweendi mayru, ndowru ndun no etaade heɓtugol ngoya senngo. Ko ɗon mi nani” Pan!!! .Hakkee ko fiyannde nden doolni mi hawti ka mi jooɗii ɗon ka jullere !
Gaɗalngal ngal hulɓini ! Cabbi ndowru ndun siŋii ka maadi wa juɗaadi yoori ! ka leydi ko guril ngil pet e gite yaltirɗe orbit mun mayde juhee heddii e mayri ! mi tawaama ka mayde ndowru ɓurndu yaawude e hulɓinaade waɗi. 😞
Sabu wirnitagol ndowru ndu mi etiino warirde weddande paɗal, weldi an ko ndun hibbi e mun doole mun ɗe 45 kiloo paɗal ngal 44 tonngoonde!
Ɓay ɗum feƴƴii tawi yeeso makko ngon ko wa on wi’uɗo ndowru ndun : « ko yaltinmaa e dow oo koɗo men, neh yo sogolooru ? » �
Mi wallimo laɓɓingol nokku bone on ( scène du crime ) wondude e fiinannde mawnde. Gila nden ñalnde, mi felliti hannde kadi mi mimmintaa bonɗi heddiiɓe ɓen ka majji. Mo kala e ndowru mun. ! 😄
Moodi aalimu. #Mo
Comments