Hezbo-Rap no daranii taariindi ndin “Ta soppu ngal”

Nde tawi, legɗe ɗen no soppee tun no soppee, jeereende nden (deeser on) no njanɗa tun no njanɗa no yaawiri, leydi ndin no yoora tun no yoora, canɗi ɗin no ɗuytoo tun no ɗuytoo, maayooji ɗin e ɓulli ɗin no ɓeeɓa tun no ɓeeɓa eh nder leydi Gine, Hezbo-Rap, fedde ɓurnde mawnude eh naalankooɓe Rap, waɗii eɓɓoore orgal (kampaañ) wi’eteende : Ta Soppu Ngal “Ne coupe pas l’arbre en Français”.

Ndee eɓɓoore, ko fii humpitagol bonne taƴgol legɗe ɗen eh nder gimol. Hezbo-Rap no nodda yimɓe ɓen anndugol himme hiwugol taariindi ndin e bonne anngal dankagol ndi e wattangol yihi eh mayri.  Ɓe faala yo yimɓe ɓen waɗu hakkillaaji maɓɓe eh toppitagol buruure nden (laddeeji ɗin). Hiɓe yamira yo legɗe aawe.

Ndee eɓɓoore no yowitii eh daawe (sagaraaji) ɗiɗi :

1.   Daawal aranal (1) ngal ko : Waɗugol e  weeɓitugol gimol ngol

• Waɗugol gimol faaminayngol alhaali on e faandaare nden

• Saakitugol e yeynugol gimol ngol e nder leydi ndin e takko  ɗoo fof

2.  Daawal ɗimmal (2) ngal ko : Golle ɗen ka leydi fii yo battin

• Waɗugol orgal ( kampaañ) yaajungal fii aawugol legɗe eh nder leydi ndin fof.

Fii laatingol ndee eɓɓoore mawnde, Hezbo-Rap no hatonjini gooto kala eh men. Ko ɗum waɗi sabu udditugol lowre ballal ka enternet fii kala  waawuɗo wallitaade yo wallito no o mariri feere wo.

Ka men winndata ngal kumpital ɗoo, hari Hezbo-Rap weeɓiti seeɗa eh gimol ngol “Ta Soppu Ngal”.

Hino ley ɗoo tonngoodeeji waawooɓe on wallude tawtoreede.

🇬🇳 +224 621 21 84 94

🇸🇳 +221 77 011 58 77

🇬🇲 +220 788 8460

Karabol: Diisondiral