Woniino saa'i goo, e nder wuro tokooso ɓiliingo e hakkunde pelle, wonkiiji ɗiɗi suɓondirɗi gila e paykun-yaagal maɓɓe. Nen Kanni e Juhe, kawtalɓe e janngidayɓe, mawnidi, tawi hiɓe senndoda kala ko fewndii. Woni weltaare, mette maa koyɗi maɓɓe. Alaa ñalorma mo ɓe yi’idetaake hiɓe doga ka geseele, hiɓe ƴawa leɗɗe jippoo walla hiɓe jooɗii ka daande caangol, ka ɓe fodondirta e gunndoo wonde ɓe seedataa.
Nde yahi haa ɓooyi, sehilaagal maɓɓe sukaaku waylori seeɗa seeɗa, wonti giggol luggungol, laaɓungol. Tawi ko woni hakkunde maɓɓe kon no tiiɗi ɓuri haala, ko huunde nde tawata ko ɓernde laaɓunde tun waawi faamude.
Wonande Nen Kanni, Juhe no wonani mo ɓuri ɗimmoojo; ko kanko wonnoo giɗo ɓernde makko, ndaygu ngurndam makko ɗam.
Wonande Juhe, Kanni hino lomtoo kala ko o yiɗi e aduna : neɗɗaaku, moƴƴuki e fodoore janngo jalbuɗo.
Kono hay si giɗgol maɓɓe hino weli, hino weltini ɓe, duulere niwre hino wanngoo e dow maɓɓe. Mawɓe maɓɓe ɓen ko hoɗdiiɓe gila duuɓi cappanɗe, kono ko galleeji jogiiɗi teddeendi lurral ɓooyungal. Taariika yejjittaaɗo, lurral ngal meeɗaa yaafondireede, no haɗi ɗin galleeji hawrude. Ɓeynguureeji ɗiɗi ɗi iwlotaako woote.
Nde Juhe, e ɓernde piɗɗotoonde, felliti ƴamude junngo Kanni ngon, mawɓe makko ɓen salii tawtude mo. “Men jaɓataa dewgal e ɗee ɗoo galle, men tawaaka, men tawetaake.” Holliti baaba makko, gite mum no heewi tikkere nde alaa daliilu.
Kanni, mo ndee haɗeede mettini ɓernde mum haa ka anndaa, wulli jemmaaji heewuɗi. Pellet himo anndi ka nder sonndooru wonkii makko, weltaare makko nden hino jokkondiri e weltaare Juhe ndee. Kono, jiiɓiiɗo hakkunde giggol makko e ɗoftaare nde o joganii mawɓe makko ɓen, o woni ɓiliiɗo e kaso lamndal ngal o alanaa jaaba.
Ɓee sukaaɓe ɗiɗo yiɗindirɓe yiitidi e nokku ka ɗum ɗoo fow fuɗɗii ɗon: ka sera caangol wonunoongol seedee sukaaku maɓɓe deƴƴuɗo. Juuɗe maɓɓe hino tamondira ko neeɓi, hino wa'i wa si tawii ko dartagol koddoruyee.
“Mi yiɗete haa poomaa, no yeeso waawi wonirde fow” Juhe ŋuni, hito mum hino teddi sabu mettu ɓernde, gite ɗen no huuli gomɗi .
Kanni ɓamtii ɓaawo ugginande juutunde, kono waawaali haalude. Gomɗi ɗin hino haala ko o haalaynoo, hiɗi jippora tati tati.
Ɓe ɗiɗoo non hiɓe felliti wonnde laawol giggol maɓɓe ngol hino ɓeydoo ñannde woo ñannde sattude, kono huunde wootere hino laaɓi: hay si ngurndam senndii ɓalli maɓɓe, ɓerɗe maɓɓe seedataa abadaa. Hino jokkondiri e ndee fodoore deƴƴunde nde ɓe waɗunoo hakkunde maɓɓe e sera ngol ɗoo caangol, ko ɓooyi.
Giggol sukaaku ngol tawata, hay si caɗeele hino woodi, hino jalbude e nder niwre.
Seydi Bari
Comments