GAAZA : hay si tawii hare ɗen dartinaama, deeƴere waɗii, kono ɓuttu duumiiɗo e jam tabituɗo welaali heɓunde taho

Israyel e Hamaas nanondirii ñalnde alarba 16 lewru nduu fii dartingol hare ɗen to Gaza e accitugol israayelnaaɓe dahaaɓe Hamas. Fii kala ngal nanondiral waɗii, heɓugol ɓuttu e jam ko tabiti welaali fii taho.

Wattitugol dahaaɓe israayelnaaɓe  e sokaaɓe palestinaaɓe

Ɓaawo ko ɓuri lebbi 15 hare bonnde, nanondiral ɓanginaama ñalnde alarba ndee. Ngal nanondiral no eɓɓi  daawe ( sagaraaji) tati :

Ka daawal (sagara) aranal ko:

• Darnugol hare ɗen jonnte jeego (6), gila ñalnde alat, 18 lewru nduu

• Ɗuytugol seeɗa-seeɗa konu Israayel eh laral Gaza ngal

• Wattitugol dahaaɓe israayelnaaɓe 33 e sokaaɓe palestinaaɓe ko ɓuri wuluure (ujune gooto). Ɓee yimɓe ɗoo fow heɗtay hoore mun.

• Ɓeydugol ballal neɗɗankaaku eh nder laral Gaaza ngal.

Ka Daawal ɗimal, fuɗɗotoo ngal ka yontere jeegaɓere (6) si tawii daawal aranal ngal hunnaama, ko :

• Accitugol dahaaɓe israayelnaaɓe ɓen fow

• Tabintingol darnugol hare ɗen eh laral Gaaza ngal

• Yaltingol konu israayelnaaɓe eh laral Gaaza ngal

Ka daawal tammal, si tawii daawal aranal ngal e ɗimmal ngal laatike no haaniri, ko:

• Accitugol yimɓe ɓe fow

• Wattugol cuuɗi ɗin e saare nden Gaaza. Ko Misra ( Ejipt), Katar e Dental leyɗe Aduna (ONU, UN) woni ko toppitoytoo ɗum.

Ka anndintingol,

Ɗee hare ko nde Hamaas juhirnoo warngo israayelnaaɓe ñalnde 7 lewru 10ɓuru 2023 ɗe fuɗɗii. Ɗum waɗi banŋe Israayel :

• 1 210 maayɓe tawi ko ɓuri heewde eh maɓɓe ko siwilɓe ɓen

• 251 yimɓe nanngaaɓe.

Eh nder 251 nanngaaɓe nden ñannde, 94 ina dahaa haa jooni to Gaza, 34 maayi eh wiide konu israayel.

Sabu ndee juhannde, Israayel yani eh Gaaza. Gila ɗum, ko famɗi fof 46 788 yimɓe Gaaza waaraama eh ley fellanɗe konu Israayel eh nder Gaaza, ko ɓuri heewde eh maɓɓe ko siwilɓe. Ko ɗum holliti jaagordu cellal laamu Hamaas, ko tawata Dental leyɗe Aduna (ONU, UN) no hooli.

Nanondiral ngal

Fii yo nanondiral ngal heɓo hakkunde Hamaas e Israayel, Donal TRUMP e Joe BIDEN waɗii wakkilaare mawnde fii no ngal nanondiral heɓora.

Fii ngal nanondiral, Ko eh nder lebbi buy yewtidal waɗi fii mun. Ko Misra(Ejipt), Katar e Dawlaaji Ndentuɗi Amerik (USA) yewtidi haa ngal nanondiral heɓii, ko adii Donald Trump, hooreejo leydi Amerik cuɓaaɗo, ƴettude hooreyaagal ngal ñalnde 20 lewru nduu. Ko Donald TRUMP woni ko anndini nanondiral heɓike ado suudu laamordu Amerik ndun, Suudu daneeru (White House),

Donald TRUMP hino tawaa eh wonugol sabu nanondiral ngal heɓaande. Udditannde makko nden battinii, o ɓannginii faalemako makko heɓugol nanondiral ko yaawi. Nulaaɗo makko on ka Fuɗnaange hakkundewe, Steve Witkoff, gollidii eh fedde hooreejo leydi Amerik ndin, Joe Biden, fii heɓugol nanondiral ngal. Ko ɗum Joe Biden holliti eh konngol makko, o wi’i : « Men gollidii wasi ko men kippu gooto ».

Tanƴinaare ko woni eh ngal nanondiral no ɗuuɗi, sabu hare ɗen deeƴay ko fannɗi woo seeɗa. Ko wontun, ɓuttu duumiiɗo e jam tabituɗo welaali heɓunde taho. Nde tawnde hoorejo jaagorɓe Israayeel on, Benjamin Netanyahu, anndinii eh asewe feƴƴuɗo: “darnugol hare ɗen wonaa ko duumi taho”. O watti ɗon kadi, “leydi maɓɓe ɗin si no hatonjini fuɗɗitoto hare ɗen wonndude eh ballal Amerik”.

Fewndo ɗoo

Ka ndee windande wona eh winndeede ɗoo, daawal aranal ngal fuɗɗaama. Fellugol ngol accii taho, ɗahaaɓe tato (3) israyelnaaɓe accitaama.

En torike Allah ɓuttu e jam

Karabol : Diisondiral