Ko e saa'i goo, e nder laamateeri alɗundi no wi'ee Weliyaa, no hoɗi yimɓe alɗuɓe, anndiraaɓe ganndal. Leydi Weliyaa ndin yaajaa moƴƴa, kono hindi alɗiri ngaluuji leydi heewuɗi (oogirɗe e leydi marndi ñolu). Canɗi mum no heewi tew liƴƴi, pelle ɗen fow no mari njamnɗe tedduɗe. Kala ko remaa eh leydi ndin moƴƴiray wa dille ellee keewal ñolu.
Sabu ngal ɗoo keewal ngalu, jamaa ndii ɗoo leydi mahi gure mawɗe; cuuɗi ɓuri labeede e nder duunde nden, ka kaŋŋe ilirta wa ndiyam. A taway kuɓeeje tun no darii e nokkeeli goo, tawa ko colli woni fijude ton.
Weliyaanaaɓe hino anndiraa ganndal, jawdi e wakkilaare. Duɗe Weliyaa ɗen ko ɓulli ganndal, ka miijitotooɓe maa wiɗotooɓe mawɓe dawlaaji kawtalji ɗin arata ɓeyda ganndal e fahmu.
Luumooji maɓɓe ɗin hino heewi waɗorde piiji saɗuɗi, njulaaku no yaaji haa ko tawata kala jibinande leydi ndin no wuuri e ngalu mawngu.
Kono, e nguu ɗoo ngalu fow, masiibo deƴƴuɗo no ŋoñoo laamateeri ndin : Weliyaa alaa lamɗo. Jullere laamu nden no heddori nii gila mayde laamɗo sakkitiiɗo on, alaa dono lomtotooɗo.
Si tawii heewuɓe hino towni honndu fii jullere nden, hay gooto e ko'e njane ɗen immaaki fii ardagol. Yimɓe ɓee hino janngi, no yaaji hakkil, kono hay gooto ronki heɓtude laamu ngun. Fii holɗum ? Ko ɓay hay gooto e maɓɓɓe alaa njuɓɓudi tiiɗundi e yi'ugol ka woɗɗi.
Mawninkinaare tamƴinoraaɓe ɓen
E nder cuuɗi diisondiral mawɗi, ɓurɓe alɗude Weliyaa ɓen hino heewi moɓtondirde fii etagol no ñawndira ndee ɗoo saɗteende. Kono e kala mbatu, ko lurral ɓeydotoo hakkunde maɓɓe. Mo kala, woni ko ka njulaaɓe, ka tedduɓe maaɗum ka sukaaɓe muutinɓe ganndal no wi'a ko kañun jogii feere ɓurnde moƴƴude nden. Ɓe lurri haa ɓe lutti e ɗum, hol ɓurɗo waawude laamaade.
Mawnikinaare ɗowiɓe, nanondiral meeɗaali yi’eede hakkunde maɓɓe. Faamondiral hay yeru ko yawee heɓaaki.
Woodi sikkuɓe wonde ko ɓurɓe janngude ɓen haani laamaade, ɓeya no miijii ko ɓurɓe marude jawdi ɓen tun jogii hakkee laamagol. Kono ɓe fow hiɓe derfi huunde wootere tentunde : waawugol moɓtindirde jamaa on, fewtinaɓe e janngo hawtaaɗo.
Nakkere njuɓɓudi
Weliyaanaaɓe hino kelɗi si tawii ko gooto kala e golle mum, kono ɓe waawaali gollidude fii mahugol laamu deeƴungu. Gooto fow no yiɗi naftoraade alhaali fewndiiɗo on, kono hay gooto yiɗaa hikkaade yeeso fii renndingol doole laamateeri ndin. Ɓe golliri « korun am, beɗun am »
Hino woodi wi'ayɓe ko yo laamu ngun fecce, sinca diisondiral ka tawata kala tamƴinaaɗo gaynay haaju no waawi jogaade daande nde foti jogaade .
Kono si tawii alaa ardiiɗo kelɗuɗo, yarlitiiɗo fii yuɓɓingol golle ɗee, ɗen diisondire no yaawi ko wontata hareeji laamu e lurral ngal lannantaa. Laamateeri ndin hay si hino alɗi, hino wa'i wano laana ka alaa kapiten, hika majjira seeɗa seeɗa laawol ngol, unoo e niɓe.
Kulol immoriingol ka yaasi juhiɓe
Nde hikkiiɓe yeeso ɓen yiilotonoo eh jiwdangol geɓoy mum, haalaaji soy-soy hare fuɗɗii jinndude. Kawtalɓe huulannooɓe ngalu Weliyaa ngun ko ɓooyi, hino faalaa yanude e ndee nokkuure nde alaa kiwal, alaa jom. Oo ɗoo bone e ɓadaade mum, fewjayɓe Weliyaa ɓen waawaali hawrude eh gootel.
Mawɗo ganndo gooto, yi’ayɗo ka woɗɗi, etii jeertingol ɓe : « hiɗen foti suɓaade ardotooɗo ko ɓuri yaawude, ado laawaade. Laamateeri ndi alaa hoore ko laamateeri majjundi. » Kono eeraango makko ngon yanaali eh noppi nanayɗi, sabu gooto kala e maɓɓe ko fii hoore mum jiɓii.
Yanal Weliyaa ngal
E ñalnde goo tun, masiibo on ari. Konuuji konuuji ayɓe, yuɓɓinaaɗi haa moƴƴi, hino ardiiɗi laamɗo hiiɗaaɗo, naati Weliyaa. Laamateeri ndin, eh alɗere mum e jogagol mum doole, yani e saa'i gooto. Fewjayɓe ɓee, jiɓiiɓe eh yeddondire, waawaali yuɓɓinde dartannde.
Jattooɓe ɓen heɓti gure ɗen beru hinƴa-maƴa, yani e jawle ɗen, heɓti laamu ngun. Yimɓe ɓen, woni jiiɓiiɓe e janfaaɓe immorde eh ardiiɓe mum ɓen.
Ɓaawo weemere juutunde, ɓe faami wonde jawdi e ganndal tun yonataa danndugol mawngu laamu maa heɓtugol jullere laamu. Jogagol hakkille udditiiɗe, yi'ayɗe ka woɗɗi hino haani. Heɓa ardotooɗo, tawa ko neɗɗo waawuɗo waylude ɗii ngaluuji ɗoo waɗta ɗi doole duumotooɗe.
Ko nii taariika Weliyaa timmiri, laamu alɗunoongu, ngu tawata sabu ŋakkere ardiiɓe yi'ooɓe ka woɗɗi e njuɓɓudi kelɗundi, majjiraama kala ko mahunoo e nder duuɓi dunti. Yeesooɓe mum fow laaworii paɗal, fattoyike ka jananiri. Heddiiɓe ɓen wonii e ley konngol dooluɓe leyndi ndin, jogitii haa satti ken.
Seydi Bari
コメント