Feƴƴiino e saa’i goo, e nder hoɗo, deeƴungo, hino hoɗidi yimɓe ɗiɗo, ɓe nguurndam mum seerti moƴƴa. Arano on hino alɗi fota, hino jogii mbuuɗi hay ko haykee. Ɗimmo on ko miskiino haa wa mum.
Hay si tawii galleeji maɓɓe ɗin no ɓadondiri moƴƴa, laawi maɓɓe hino famɗi ko fottata. Kono, ñalnde goo, huunde nde habbanooka, waylay no alɗuɗo on yi'irta alhaali ngurndam aduna on e no kala maɓɓe yi'irta oya non haa poomaa.
Jom jawdiijo on
Alɗuɗo oo, hino wi'ee Fooli, himo hoɗi e galle mawɗe e hoore pellun. Hino hunnditimo lare leydi yaajuɗe e kippuuji gollooɓe. Hoggo makko ngon no heewi tew daƴƴe rimayɗe ko wa’i wano leemunne, piya, buudi-dari ekn.
Fooli no joginoo kala ko hakkil makko sunantoo e nder aduna : comci fooluɗi, ñaamnduuji ɗaɓɓaaɗi, pucci yaawuɗi e keyeeji hittuɗi iwrayɗi eh cenɗe fow. Kono ɗum ɗoo fow e wa'ude non, himo heewi yi'ude yolnde e nder ngurndam makko ɗam. O waawaa faamude e ngal maral makko jawdi fow, ko haɗi mo heɓugol ɓuttu ɓernde. O sikkuno weltaare makko nden ko e heɓugol jawdi ɗuuɗundi fawii.
Ñalnde woo o feƴƴiray yeeso kun cuhun yakkiikun, ka o heewi yi'ude gorko no jooɗii e yaasi. Hino ɓornii comci daneeji, hippii kufune hawruɗo. Kono saa'i fow yeeso mum no hentii, hino heewi moose. Fooli meeɗaa ƴettude ko ɓuri famɗude e waktu makko fii wattugol yili e oo gorko mo o jogitii puyɗo, mo maraa ñaa, mo tawata jaraa huunde e aduna makko alɗuɗo on.
Gorko miskiino on
Oo gorko, ko Umaru. Ko o waasii kon fow, himo jogii kanko kadi ngalu e noone goo : weltaare. Umaru alaa mbuuɗi, maraa keyee dariiɗo walla waaliiɗo, kono himo jogii ɓuttu ɓernde. Ñalnde weeti woo o immoday e yettoore, o weltora ko o jogii kon, ko famɗi woo. Himo wuuri ngurndam hoyuɗam, deeƴuɗam, heewiɗam yontahoy weltaare. Himo yiɗi heɗitagol gimoy colli (aataango coloy), henndu leɗɗe ɗen e fijudugol-jalida eh hoɗdiiɓe makko.
Ñalnde goo, Fooli, e kumpa mum yiɗi faamugol ko holto ndee ɗoo deeƴere Umaru immorii, felliti ɓadtaade mo, yewtida eh makko.
Joɗnde nde tamƴinanooka
“Hol no waawirtaa weltaade tawa a alaa hay huunde? », lamndii Fooli eh mbaadi yawitaare. Umaru, e moose mum daɓɓe wano woowiri non, jaabii : « giɗo am, hino gasa tawa mi alaa jawdi yaajundi, kono miɗo jogii kala ko fot-mi heɓude e nder ngurndam am. Miɗo jogii cellal, yaasi kin, e yimɓe ɓe yiɗu mi. Ko ɗum ɗoo woni ngalu tigi-tigiiwu ngun. »
Ngol ɗoo jaabawol jiiɓi hakkil Fooli kin. Ko honno neɗɗo weltortoo tawa alaa kon ko tawata himo tamƴininoo ko ɗum hitti ? Balɗe heewuɗe, o ɗaanaaki, himo jokki tun miijitagol fii ndee ɗoo joɗnde. O anndi on tuma, hay si himo jogii jawdi ko yonata, o meeɗaa heɓude timmal maa mbelam ɓernde ko Umaru wuuri e mum ñalnde kala.
Jannde Nguurndam
Fooli felliti artugol e laawol ɗimmol yiyda e Umaru. Ɗoo wonaa fii laamnde, kono ko eh ɓernde udditiinde. O feƴƴindini e makko yonta ɓurɗo juutude, himo ndaara taskoo no o wuuriri, himo jentoo ko o sifotoo ko fayti eh hoyere nguurndam makko.
Seeɗa seeɗa, Fooli fuɗɗii faamude wonde weltaare wonaa moofturu jawdi tun, kono ko waawugol weltorde ko jogii kon, hay si tawii ɗuuɗaa.
Seydi Bari
Comments