Kɗl : Alfaa A. Ɓuriyaa Jallo (ngurndam nelaaɗo)
Sabu ferugol nelaaɗo ngol Makka ara Madiina ngurndan ɗan waylii, ko ɗun si julɓe ɓen fottani yo ɓe waɗu fuɗɗoode taariika kan, hitaande nde nelaaɗo feri nden Makka, o ari Madiina.
Hiɗen naatani nii hitaande 1430 F.N. (Fergu nelaaɗo), ɗun hino ko yeru duuɓi wonɗi ɗin kakkunde men e ndee ñalaande mawnde ɗoo.
Ko sabu mayre lislaamu on saakitori ka hoore leydi; ko sabu mayre kadi nunɗal dogiri ka hoore leydi, ko sabu mayre pinal saakitori ka hoore leydi; ko sabu mayre malal e barki woniri ka hoore leydi.
Nelaaɗo ñiiɓi Yasri; nde wonti hinde wi’ee (nde wayli innde) ɓaawo o jippike e mayre: Madiinatul Munawwara ( saare norɗinaande).
Nelaaɗo mahi ton galle makko ɗen; e juulirde nden o didi ɗon laral ( dawla) julɓe aranal ngal. O wuuri Madiina e hoore ɓuttu e malal e deeƴere, kan ko e ɓeynguure makko: himo saakita diina Alla kan no weeɓiri fota e hoore ndimankaaku; o nodda yimɓe ɓen denndaangal e diina kan.
Himo anndina julɓe ɓen diina hesa kan; o dakmitira ɓe annoora peewal lislaamuyankowal ngal; ɓe fow ɓe wuuri ko ɓe malaaɓe; feewuɓe sabu peewal Alla ngal.
Ko aɗtii arugol nelaaɗo Madiina, hari hino hoɗi ton leñon Awsu e leñol Xajraju; e leƴƴi goo e Alyahuudu en; hari non ɗi fow hiɗi lurri; hiɗi jurondira.
Ammaa non Awsuyankooɓe ɓen e Xajrajuyankooɓe ɓen ko ɓuri jaalaade kon e maɓɓe silmi, naati ka lislaamu; seeɗaaɓe nii luttiti e gunndoo ka diina maɓɓe hikka.
Hoɗunooɓe ɓen Madiina ɓaawo fergu nelaaɗo ngun e mayre hino feccinoo e ɗee pecce arooje ɗoo:
Feruɓe ɓen( Almuhaajiruun): ɓen ko quraysiyankooɓe silmuɓeɓen; ɓe feri Makka ɓe ari Madiina; ko ɓe sembinɓe nelaaɗo; sakkiiɓe jawle mun; e koɗanɗe mun e fii ɗatal wallitagol diina lislaamu kan.
Taakanɓe ɓen wal Wallitiiɓe ɓen (Al’anshaar): ko ɓee woni hoɗuɓe hiɓɓe Madiina ɓen; silmuɓe e gunndoo e kenenke; ɓe laɓɓinani diina maɓɓe kan Alla e nelaaɗo; ɓe sakkii jawle maɓɓe ɗen e wonkiiji maɓɓe ɗin e fii laawol Alla.
Naafiqiiɓe ɓen: ko jeyaaɓe e taakanɓe hiɓɓe ɓen; ɓe slimi ɓenaati ka diina ka kenenke; ka gunndoo ɓe deppitii e diina maɓɓe hekka kan.
Alyahuuduyankooɓe ɓen: ko wonnoɓe ɓen e diina Alyahuudu kan“diina Annabi Muusaa kan” gibi ko neeɓi; ɓaa non lislaamu on arii, ɓe lutti jogitagol diina maɓɓe kan; kono ɓe fiɓidi e nelaaɗo pottal weldigal e aadi halfondiral; ɓe ɗoworani nelaaɗo ɗoftagol.
Alla sifike fota ka Alqur’aana fii kala e maɓɓe : feruɓen ɓen , e taakanɓe ɓen ; e naafiqiiɓe ɓen e alyahuuduyankooɓe ɓen; ɓee hoɗunooɓe Madiina e maande nelaaɗo; o fewtini e kala e maɓɓe yewtere; hino e ko o sifii feruɓe ɓen e taakanɓe ɓen:
“ Muhammadu ko nelaaɗo Alla; ɓen wonduɓe e makko ko tiiɗuɓe e hoore heeferɓe ɓen; yurmodirɓe hakkunde maɓɓe; hiɗa yi’a ɓe ko ɓe turiiɓe; sujjuɓe;[juulooɓe] hiɓe ɗaɓɓa ɓural ka Alla e yarluyee..”. 48:29.
Comments