Kɗl : Alfaa A. Ɓuriyaa Jallo (ngurndam nelaaɗo)

Nelaaɗo ko hawrunooɗo darnde, daneejo, daneha makko kan ko wa’itayka wa si wojjitay, ɓawluɗo sukundu, sukkuɗo waare, yaajuɗo balbe, ɗaatuɗo newe, labaaɗo mbaadi. Kala ndaaruɗo mo tenƴinayno mo, sabu ŋari makko kin .

Nelaaɗo anndiraa hakkunde yimɓe makko ɓen timmugol hakkil, o lolliri dokkal e newaare e cuucal e muñal, e wowlugol goonga, e laaɓugol ɓernde, kene e gunndoo;  himo yiɗunoo yimɓe ɓen denndaangal, foti si ko giɗo maa ko gaño.

Gila o wonnoo paykum himo añunoo sanamuuji ɗin e rewugol ɗi, o arataano kawtite diinayankooje ɗe qurayshiyankooɓe ɓen waɗaynoo, himo añunoo sanngara (beere) o yaraali nde, himo añunoo bone fow, feeñuɗo e suuɗiiɗo.

Himo yiɗunoo Alla, laaɓinani Mo, himo woɗɗitotonoo yimɓe ɓen, o weddoo kanko tun e fammeere wi’eteende Xhaar-hiraa takko Makka, o taskitoo taguuli Alla ɗin e wooɗugol winndere nden, o woni e ɗum dumunnde juutunde, haa goonga kan ari mo .  Jibriilu, malaa’ikaajo on yewti mo.

O wi’i nelaaɗo : Janngu !

Nelaaɗo jaabii : Min, wonaa mi janngoowo. ay : mi anndaa janngugol e winndugol, sabu nelaaɗo ko humambinndi wonnoo ; winndataa, janngataa. On tuma Alla teddiniri mo wirnangal ngal (wahayu on).

On tuma ɗee simooje arane ɗoo jippii e makko: Iqra’a bismi rabbika…

(Janngu e innde Joom maa, On taguɗo, o tagi neɗɗanke e heɗɗere.  Janngu ko Joomi maa ɓuri teddude.  On anndinirɗo karambol “kuɗol”. O anndini neɗɗanke ko o anndaano).