Kɗl : Alfaa A. Ɓuriyaa Jallo (ngurndam nelaaɗo)

Nelaaɗo Alla Muhammadu (s.a.w) ko Makka jibinaa, e tenen ñannde 12 paran, e hitaande mawba, ɗum hawri ñannde 20 Ibriil hitaande 571 J.A.I.

Baaba-en makko ko Abdullaahi mo Abdul Muttalibi, haashimiyankeejo, qurayshiyankeejo, o feƴƴini wano lebbi ɗiɗi ko adtii nelaaɗo jibineede. Ontuma maama makko, Abdul Muttalibi, koohoojo qurayshiyankooɓe ɓen dannkii mo, fawtii mo. Ko kanko femmbi mo Muhammadu.

Nelaaɗo Alla ( s.a.w) funti e ɓeynguure teddunde ko kanko woni : Muhammadu mo Abdullaahi mo Abdul Muttalib mo Haashim mo Abdu Manaaf mo Qusay.. Ɓee maamiraaɓe ɗoo fow ko jaambaarooɓe, koohooɓe tedduɓe ɓe fow ɓe laatinoo.

Yumma makko : ko Neene Aaminata mo Wahab mo Abdu Manaaf mo Zuhrata, ndee ɓeynguure ɗoo kadi hino jeyanoo e ɓuruɓe teddude e qurayshiyankooɓe ɓen.

Hino e aadaaji aarabeeɓe ɓen nun, naɓugol boobooɓe maɓɓe ɓen ka fulawaaji, rewɓe ɓen ton muynina ɓe.

Maama nelaaɗo jonni mo sonnaajo wi’eteeɗo Haliimatu Sa’adiyah, ɓe yahdi ka marga hun makko (Baadiyatu banii Sa’ad) o muynini mo ton.

Nelaaɗo mawni ka jeereende, ley weeyo laaɓungo, hakkunde yimɓe fulawaa laaɓuɓe ɗemɗe. O woni ton duuɓi nayi.

O arti Makka ɓaawo nde o heɓunoo duuɓi nayi, o wontidi e yumma maako duuɓi ɗiɗi ɓaawo ɗum; yumma makko faatii.

Ontuma maama makko dankii mo, o moƴƴii e makko fota, kono kanko kadi o feƴƴini ɓaawo duuɓi ɗiɗi e faatagol yumma makko.

Bappa makko Abuu Taalib (baaba saydinaa Alii)  toppitii mo, dankii mo haa o woni gorko timmuɗo.

Nelaaɗo (s.a.w) toppitii ngeeygu wano denndanngal sukaaɓe qurayshiyankooɓe ɓen fewndo onsay. O anndiraa hakkunde wimɓe ɓen fow yaajugol hakkil e nunɗal e hoolaare, ɓe jammi mo Holniiɗo (Al amiin).

On tuma tawi hino e nder Makka sonnaajo galo wi’eteeɗo Kadiijata o nani fii hoolaare nelaaɗo nden, o ɗaɓɓiri nelaaɗo yo ngeyginano mo jawdi makko ndin.

Sonnaajo on heɓi jawdi mawndi sabu hoolaare nelaaɗo nden. Ɓaawo o tinii ɗum, o ɗaɓɓiri nelaaɗo yo resu mo.

O jibinani nelaaɗo denndaagal ɓiɓɓe makko ɓen si wonaa Ibrahiima. ɓen ɓiɓɓe non ko: Alqaasimu, Abdulaahi, Zaynabu, Ummu kulsuumi, Faatuma zahraa.

Nelaaɗo hino marnoo duuɓi 25 ñannde o resi neene Kadiijata, kanko sonnaajo on himo marurunoo duuɓi 40! Hiɓe yiɗindirnoo fota, ɓe wuuridi ko ɓuri duuɓi 25 e dewgal barkinaangal, malaangal.

Neene Kadiijata faatii e hitaande tataɓere ado fergu nelaaɗo. Yo Alla yurme ɓe fow.

Hino jeyaa e sonaaɓe ɓe Nelaaɗo resi ɓaawo faatagol oo sonnaajo ɗoo e ko heddii kon e ngurndan makko ɗan : Neene sawdatu mo jam’a , Neene Aa’isha mo Abubakri,  Neene Ummu Salama

Ɓee ɗoo non fow ko Neene Aa’isha tun nelaaɗo resi hari ko curbaajo!