Kɗl : Alfaa A. Ɓuriyaa Jallo (NGUURNDAM NELAAƊO SAW)

Hari aarabeeɓe ɓen hino wuuri ka leydi maɓɓe, hiɓe toppitinoo ne’ugol gelooɗi, sabu hiɓe waɗɗotonoo ɗi ka seteyaagal maɓɓe, ko e tebbeeli majji ɗin ɓe wuuri, ko e kosam majji ɗan ɓe yarata, ko e leeɓi majji ɗin ɓe moƴƴinta tillisooji, ɓe saña ɓornateeri.

Ko ɗun waɗi hiɓe yiɗunoo gelooɗi fota, hiɓe dankitotonoo ɗi, hiɓe ɗaɓɓanaɗi durirɗe alɗirɗe huɗo, ko sabu ɗun ɓe woni e eggugol tun fii ɗaɓɓitugol ɗen aynirɗe.

Ko ɓurnoo jaalaade kon e aarabeeɓe ɓen hari hino wuuri ngorndan fulawaa, yoga e maɓɓe hari hino ka ca’e, woɓɓe goo non kadi hari hino neeminornoo pinal e ngalu.

Sowndo woo hari, hare hino memminii hakkunde maɓɓe, sabu aynirɗe e ko wa’e non, hiɓe yaraynoo fota sangara (beere), ɓe wara ɓiɓɓe maɓɓe ɓen ka kulol baasal, ɓe ubba jiwoy maɓɓe koy hara hikoy wuuri, ka kulol  baasal e korɗineede e ñakko.

Hiɓe rewaynoo sanamuji (ɗun ko leɗɗe maa kaaƴe lesaaɗe, moƴƴinaa wa mbaadi neɗɗo maa kullii) ɓe rewa ɗin ko woori Allah.

Gorol kala e gori aarabeeɓe ɓen hino marnoo sanamuuru, yoga e majji hino rewaynoo naange e lewru, e koode.

Alla okki aarabeeɓe ɓen sifaaji moƴƴi ɗi ɓe anndiraa gibi ko neeɓi, hino e ɗin : dokkal, e cuucal, e nunɗugol, e hiwugol fattiiɗo.

Aarabeeɓe ɓen maraano ko adtii lislaamu dawla hawtituɗo ɓe, hi ɓe woni tun gori luutondirɗi, sertuɗi, dolnuɗi ɗin tooña lo’uɗi ɗin. Grol ngol fow hari hino ɗoftii hooreejo gooto, wi’eteeɗo ( mawɗo gorol maa mawɗo musidal).