Kɗl : Alfaa A. Ɓuriyaa Jallo (ngurndam nelaaɗo)

Aarabeeɓe ɓen ko adtii lislaamu on, ko ɓaawooɓe nun, ɗuuɗunooɓe jikkuuji yuppitiiɗi, sirkaynooɓe, rewaynooɓe sanamu.

Hari ɓe hulaataa Alla, hiɓe yoori-ɓerɗe, hiɓe wartindiraynoo ko ɗuuɗi, ɓe ubba jiwoy maɓɓe koy hara hikoy wuuri, ndolnuɗo e maɓɓe tooña lo’uɗo, ɓe naata e hareeji duumiiɗi sabu piihoy taafehoy.

  Tawi non ko ɓuri jaalaade kon e aarabeeɓe ɓen no wuuri e majjere mawnde e yuppitannde njannde, ko ɓuri ɗuuɗude kon e maɓɓe ko kañun ɓuri woɗɗitaaɗe e yimɓe aduna fow e fee pinal.

Konii wonnoo alhaali aarabeeɓe ɓen ñannde Alla nelunoo Muhammadu geɗal Abdullaahi (saw) e aarabeeɓe ɓen e aduna Allah on fow.

O neliri mo yurmeende fii winnndere nden, o neliri mo, timminngol jikkuuji moƴƴi, e fii yo o saakitu malal ka hoore leydi.

Nde aarabeeɓe ɓen silmunoo, ɓe naati ka lislaamu ɓe wonti mofte ɓurɗe moƴƴude e ko yaltinanaa yimɓe ɓen.

Ɓe gomɗini Alla e ngurndan sakkitoran ɗan, ɓe feewiri sabu ko woni kon ka deftere Alla, ɓe wonti ɓuruɓe moƴƴude jikku e yimɓe ɓen, e ɓuru ɓe marde gomɗinal, ɓe wuuri ko ɓe malaaɓe.

 Ɓe wonti yiɗuɓe yimɓe ɓen denndaagal, ɓe golliri kala noɓe waawiri fii mehugol tampere ka hoore leydi, e saakitugol peewal lislaamuyankowal ngal hakkunde yimɓe ɓen, sabu ko e ɗun malalal maɓɓe ngal e peewal maɓɓe ngal woni.

Ɓe laatii ɓuruɓe yimɓe ɓen fow ganndal e pinal. Wurii hay dumunnde raɓɓiɗunde yawtaali e feƴƴinngol nelaaɗo (saw) haa julɓe ɓen laatii kamɓe tun e anuda on, yimɓe pinal e ganndal.

  Yoorere-ɓernde maɓɓe nden waylii wonnti yurmeende, ɓe ɓuri yimɓe ɓen fow yurmeende, ɓe saaki nunɗal e yerondiral haqqee-denndiyankowal e anduna on, ɓe haɓi baasal.

Ɓe woni ɓuruɓe kelɗude, e ɓuruɓe ganndiɗugol, e ɓuruɓe hulugol Allah rentoo, e mofte ɓuruɗe moƴƴude ka hoore leydi.

   Alla sifike ɓe ka Alqur’aanare, o fewtini e maɓɓe yewtere nden :

Seniiɗo toowu ɗo on daali :

Wano o daaliri kadi:

  Julɓe ɓen ko kanɓe ɓannginani yimɓe ɓen laawol malal, ɓe janni ɓe pinal ngal neɗɗanke wonnoo ɗaɓɓitude.

Awa kala gomɗinɗo ko woni kon ka Alqur’aanaare, o huliri Alla no o yamiri non, haray o feewii, o dakmitike welayee Allah, on welayee mo neɗɗo kala woni ɗaɓɓude.

  Alla daali e fii bannginanngol yimɓe ɓen ɗatal pinal e malal:

Rawnoodi

Hiɗen haaɗa ɗoo e fee ɗan ngurndan nelaaɗo heewuɗan hikmaaji, ɗuuɗuɗan tasakuyeeji,

Hunndituɗan fiyakuuji ngurndan, siftorɗan neweende e yurmeende, fonnuɗan giɗo e gaño, welɗiɗɗo e haɓidiɗɗo si daraama yeeso sikeeli nunɗal.

Ko ngurndan ɗan dokke mun haaɗataa, ko pitilol ngol ndaygu mun ñifataa, ko peewal yaltinngal winndere nden e niɓe, artiri nde e annoora!

Ender duuɓi 23 nelaaɗo ne’i ɓeynguure makko  nden, o ɓenndini worɓe makko ɓen, ɓen cernuɓe ka dudal annabaaku, ɓaa o faatike ɓe yalti, ɓe saakitii e hoore leydi ndin, hiɓe yaltina jiyaaɓe ɓen e rewugol jiyaaɓe, naɓa ɓe e rewugol jom jiyaaɓe.. on nelaaɗo ko Muhammadu geɗal Abdullaahi, kuɗol winndoowo huuɓataa moƴƴereeji makko, defrete woorete hunnditataa ngurndan makko, si fii makko faamaama huutoraama, hary majjere mulii, tanpere lannii, bone on fow ko e anngal anndugol mo woni!

Alla wi’i mo:

Ko goɗɗo filliiwoo fii nelaaɗo , ko o sifii woo fii makko o feƴƴataa ka Neene Aa’isha maaki ɗon : "nelaaɗo  laatino Alqur’aanaare wonde seppude"!

E yettii Alla on mo golleeji moƴƴuɗi hino timmira sabu neemaaji makko, yo Alla juulu e Nelaaɗo makko on, o hisina mo, o tummbindira en e makko ka weendu e nder aljanna luttal!!  Aamiin!  

Winndande: Alfaa Aamadu Ɓuriya Jallo, lollirɗo Ustaas Ɓuriya.

Hiɗen weltanoo Cerno on, jarnaɓe, toroo yo Alla yoɓir ɓe njoddi aljanna.

En eggii ndee winndande, miijo wallitagol saakude ganndal e needi.

Eggande: Seydi Bari.