Kɗl : Alfaa A. Ɓuriyaa Jallo (ngurndam nelaaɗo)

Heeferɓe ɓen firti aadi Hudaybiyya ndin, ɓe huuɓi yoga e gori aarabeeji halfondirɗi e nelaaɗo, ko sabu ɗun konu lislaamuyankewu ngu guluuje sappo haɓoowo jippii Makka fii jaɓugol nde, naada nde ka lislaamu.

 Lislaamu on woni doole ndundarankeeje ka leydi aarabeeri ndin, e nde wonnoo non sanamuyaagal lo’ii fota, konu heeferɓe ɓen waawaano ndaraade yeeso konu nelaaɗo ngun.

Ko nii nelaaɗo fooliri sirkuɓe ɓen, lislaamu on fooli keeferaaku ngun, nelaaɗo jaɓi makka ko aldaa e hare, yimɓe mayre on fow naati ka lislaamu, ɗun non hawri  ka hitaande jeetataɓere  fergu (8) F.N.

Ko Makka, ka fewndo suudu Alla hormordu nelaaɗo darinoo o wi’i :

Nelaaɗo liɓira junngo makko teddungo ngon ko wonunoo ka Kaaba e sanamuuji, o heli ɗi fow. Suudu Alla hormordu ndu annabi Ibraahiima darni dun fii rewugol Alla wonti laɓɓinaandu  e sanamuyaagal, Alla no rewee ɗon kanko tun, kafidiɗɗo woo alanaa mo, wano o wonanoo rewireede e mayru e maande annabi Ibraahiima (aw).

Sabu non naatugol qurashiyankooɓe ɓen ka lislaamu, e laɓɓinngol ngol Kaaba on e sanamu, ko jaalii kon e gori aarabeyankooji ɗin naatiri ka diina Alla guuwe.

Yoga e gori sirkuɓe etino haɓugol julɓe ɓen, ɗi sakkoo ɓe e Kaaba on, nelaaɗo ari e majji wonndude e konu lislaamuyankewu dolnungu ngun, hare mawnde yani hakkonde nelaaɗo e gorol Hawaazina e gorol Saqiifu ɗin ɗiɗi,  julɓe ɓen fooli, nden hare non hino noddiree “ hare Hunayni”.

Ɓaawo ndee hare ɗoo, yimɓe ɓen naatiri ka diina Alla guuwe.