Kɗl : Alfaa A. Ɓuriyaa Jallo (ngurndam nelaaɗo)

Qurayshiyankooɓe ɓen eɓɓi yottagol julɓe ɓen, e haɓugol ɓe e nder Madiina, ɓe re’a lislaamu on, sabu ɓe wontii ka gite arabeeɓe ɓen hoyɓe, fii ko konu julɓe ɓen heɓi kon polgal e hoore maɓɓe ka hare Badri.

Ko ɗun qurayshiyankooɓe ɓen mooɓiti konuuli maɓɓe, ɓe ari Madiina wondude e guluuje tati haɓoowo (3 000). Rewɓe maɓɓe ɓen yaltidi e maɓɓe.

Nde nelaaɗo so’unoo fii ɗun, o yalti e maɓɓe wondude e konu hawtitugu wuluure haɓoowo (1 000), ka tummbo ɗatal Abdullaahi bun Ubayya sortodi e tataɓal yimɓe ɓen, hari ko naafiqiiɓe. Heddanooki wondude e nelaaɗo si wonaa gomɗinɓe teemeɗɗe njeeɗiɗo 700 jihaadiyankooɓe (yo Allah yurmeɓe fow).

Konuuli ɗin ɗiɗi fotti e nokkuure wi’eteende Uhdi, ɗi waɗi tiinde e taasannde, hare nden fuɗɗii, julɓe ɓen fooli sirkuɓe ɓen ka arwannde polgal manngal. kono ɓay hare nden onndii yimɓe yogaaɓe e fedde fanpotoonde nden lunndii yamiroore nelaaɗo nden, ɓe sotti ka nelaaɗo yamirnoo ɓe wota ɓe iwu ɗon.

Sabu ndee lunndannde ɗoo julɓe ɓen foolaa, koɓuri ɗuuɗude kon e maɓɓe dogi, ronki heddaade ka hollaande hare si wonaa nelaaɗo e jamaa limotooɗo, onsay nelaaɗo ewnii e maɓɓe, o wi’i:

"ko min woni annabaajo on, hinaa fenaande, ko min woni geɗal Abdul Muttalibi on".

Onsay julɓe ɓen tummbondiri banŋe makko kadi, Alla walli lislaamu on.

Julɓe campanɗe njeeɗiɗo (70) yani sahiidi ka hollaande jihaadi, wonndiiɓe nelaaɗo (yo Alla yurme ɓe), no e maɓɓe piyoori Alla ndin koohoojo men, Hamza geɗal Abdul Muttalib, bappa nelaaɗo Alla on, gooto  e jaambaarooɓe lislaamu ɓen (yo Alla yurme mo).

Ndee hare ɗoo waɗi ka hitaande tataɓere fergu ( 3) F.N., hitaande 625 JAI.