Kɗl : Alfaa A. Ɓuriyaa Jallo (ngurndam nulaaɗo)

Nde nelaaɗo Alla on joɗtindinoo Madiina, lare (dawlaaji) ɗiɗi wonti ka leydi aarabeeɓe ɓen:

 laral lislaamu ngal, laamorde maggal ko Madiina ; e laral sirku ngal, laamorde maggal ko Makka.

Yimɓe Makka ɓen no nawlani diina maɓɓe kan e sanamuuji maɓɓe ɗin ; julɓe ɓen hino gomɗini diina Alla kan ; ko ɓe eɓɓidaniiɓe maayugol fii makka, sirkuɓe ɓen non bonike e julɓe ɓen fota : ɓe ƴetti jawle maɓɓe ɗen ; ɓe raɗii ɓe e koɗanɗe maɓɓe ; hinaa e hoore huunde ; si wonaa tun fii finnde maɓɓe nden ; e ko ɓe laɓɓinani kon joom maɓɓe e sabu diina maɓɓe kan ; kan ka Alla suɓii fii fewnugol ɓanndinke.

Ko ɗun qurayshiyankooɓe ɓen fonndani haɓugol julɓe ɓen ; fii yo ɓe reenu diina maɓɓe kan ; ɓe hiwa jawle maɓɓe ɗen ; julɓe ɓen kadi eɓɓi danndugol diina maɓɓe kan e pittaali maɓɓe ɗin ; hi ɓe anndi Alla daalaniino annabaajo makko on :

( ko waajibi e hoore amen [Alla] wallugo gomɗinɓe ɓen). ruumi30:47

 Ko ɗun waɗi tabalde hare tappaa hakkunde julɓe ɓen e qurayshiyankooɓe ɓen, ndee hare non duumii ko ɓuri duuɓi sappo; julɓe ɓen e sirkuɓe ɓen soccondiri e haareeji wuluɗi; kono saa’i woo polgal ngal wona geɓal julɓe ɓen.

Alla duganii nelaaɗo e julɓe ɓen hiwugol diina maɓɓe kan e laral maɓɓe ngal; o wi’i ɓe:

Nelaaɗo haɓidi e heeferɓe ɓen hareeji heewuɗi; ko ɓuri lollude e majji ko Hare Badri njannde nden.

  Nelaaɗo hunpitii feƴƴugol setewol geynguyankewol qurayshiyankooɓe ɓen, hingol iwri Shaami; hingol hootude Makka; nelaaɗo yalti arnanagol ngol, sakkitoo ngol; qurayshiyankooɓe ɓen emmini fedde hiwoore ko haɗa nelaaɗo  hewtugol setewol ngol.

  J

ulɓe ɓen fotti e qurayshiyankooɓe ɓen e nokkuure wi’eteende Badri ; sirkuɓe ɓen laatii hino ɓuri julɓe ɓen, hare mawnnde; wulunde yiilii hakkunde feddeeji ɗin ɗiɗi. “Ngal naati e serdu, ngal yalti e serdu”.. laatii julɓe ɓen fooli polgal njanal; Alla walli diina makko kan; samuyaagal foolaa; limoore mawnnde e sirkuɓe yani ka hollaande hare; buy e maɓɓe woni e kaɓɓol.

Nelaaɗo hewtiti Madiina ko o fooluɗo jaambaaro; heeferɓe qurayshiyankooɓe ɓen yiltitii Makka ko foolaaɓe; uggimɓe ko’e.

Nelaaɗo huuwondiri e dahaaɓe ɓen huuwondiral moƴƴal; o waɗani ndimankaaku “rinɗineede”  kala gooto e maɓɓe anndinɗo julɓe sappo winndugol e janngugol; ɗun ɗon wonana mo cottudi e sokeede e dummbeede, yimɓe ɓen anndi wondema lislaamu on ko arani ko haɓugol sanamuyaagal e keeferaaku e jaggitugol e majjere e human-binndiyaagal.

 Ndee hareɗoo laatii ka hitaandeɗiɗaɓere fergu (2)F.N.;ɗun hawrie hitaande 624 J.A.I.; ko sabu mayre lislaamu on teddiri ka leydi aarabeeɓeɓen;ɓen aarabeɓe haawortenooɓe jaambaaroyaagal e cuucal,ɓe wonti hiɓe ndaarira julɓeɓen ndarɗe teddungal e yonugol.!